‘‘எந்த தொண்டனுக்கு திமுக தொந்தரவு கொடுத்தாலும் விடமாட்டோம்!’’ஜெயக்குமார் கைதுக்கு பின்னே சூளுரைக்கும் அதிமுகவினர்

Untitled-1.jpg

THE KOVAI HERALD

அதிமுகவிற்கு கடந்த வாரம் தேர்தல் வாரம் என்பதை விட போராட்ட வாரம் என்றே சொல்ல வேண்டும். அந்த அளவு தமிழகமெங்கும் போராட்டங்களை நடத்தி முடித்த அக்கட்சி உச்சகட்டமாக 28ம் தேதி தமிழகம் முழுக்க மாவட்ட தலைநகரங்களில் மாபெரும் ஆர்ப்பாட்ட போராட்டங்களை நடத்தி முடித்திருக்கிறது. பொதுவாக ஒரு கட்சி எதிர்கட்சியாக இருக்கும்போது போராட்டத்திற்கு திரளும் தொண்டர்கள் படை என்பது சிறியதாகவே வரும். ஆனால் அதை சமீப காலங்களில் தொடர்ந்து முறியடித்து வருகிறது அக்கட்சி. குறிப்பாக கோவை மாவட்டத்தில் அதிமுக போராட்டங்களுக்கு திரளும் கூட்டம் எல்லை கடந்தே செல்கிறது.
பல்வேறு அமைச்சர்கள் வீடுகளில் இலஞ்ச ஒழிப்புத்துறை ரெய்டு நடத்தியபோது, குறிப்பாக முன்னாள் அமைச்சர் எஸ்.பி.வேலுமணி வீடுகளில், அலுவலகங்களில் ரெய்டு நடந்தபோது ஆங்காங்கே கட்சித் தொண்டர்கள் திரண்டனர். மறியலிலும் அமர்ந்தனர். அந்த சம்பவத்திற்கு பின்னர் சென்னையிலிருந்து கோவை திரும்பி வேலுமணியை வரவேற்க லட்சம் தொண்டர்கள் கோவை பீளமேடு விமானநிலையத்திலிருந்து 2 கிலோமீட்டர் தொலைவில் உள்ள அவிநாசி சாலை வரை அணிதிரண்டு கோவை நகரையே திக்குமுக்காட வைத்தனர். இதைத் தொடர்ந்து சில மாதங்கள் கழித்து அதிமுக அரசு போட்ட ஸ்மார்ட் சிட்டி திட்டம் உட்பட சுமார் 100 முக்கிய திட்டங்களை செயல்படுத்தாது நிறுத்தி வைத்திருப்பதை கண்டித்து கோவையில் எஸ்.பி.வேலுமணி தலைமையில் போராட்டம் நடந்தபோதும் சுமார் லட்சம் பேர் ஐந்து திக்கிலிருந்தும் திரண்டு வந்தனர். இதனால் கோவையே போக்குவரத்து நெரிசல் ஏற்பட்டு பாடாய்பட்டது. போராட்டக்காரர்களை ஒழுங்கு படுத்த முடியாது போலீஸ் காவல் துறை திணறியது.
இந்த நிலையில்தான் கடந்த வாரம் வரை அமைதியாக போய்க் கொண்டிருந்த உள்ளாட்சித் தேர்தல் பிரச்சாரம் கலவரரூபமெடுத்தது. கோவை ராமநாதபுரத்தில் ஒரு மண்டபத்தில் வாக்காளர்களுக்கு பணப்பட்டுவாடா செய்து கொண்டிருந்த ஒரு கும்பலை பாஜகவினர் அம் மண்டபத்தின் கதவுகளில் பூட்டைப் போட்டு விட்டு போலீஸிற்கு தகவல் கொடுத்தனர். ஆனால் ரொம்ப நேரம் கழித்து வந்த போலீஸார் வாக்குக்கு பணம் கொடுத்தவர்களை காப்பாற்றி சென்றனர். இதன் பின்னணியில் கோவை மாநகராட்சியின் மூலைக்கு மூலை வாக்குக்கு பணப்பட்டுவாடா செய்யப்பட, அவர்கள் எல்லாம் ஆளுங்கட்சி ஆட்கள் என அதிமுகவினர் பிடிக்க, ஒவ்வொரு இடத்திலும் ரணளம் ஆனது.
இதில் வெகுண்ட கோவை அதிமுக எம்.எல்.ஏக்கள் நாலு பேர் புலியகுளம் பகுதியில் திரண்டு போலீஸ் ஸ்டேஷனை முற்றுகையிட்டனர். அதைத் தொடர்ந்து இந்த போராட்டக் களத்திலும் நேராக நுழைந்த எஸ்.பி. வேலுமணி தேர்தலில் முறைகேடுகள் நடப்பதாக, நடவடிக்கை எடுக்குமாறு கூறி போலீஸ் கமிஷனரிடம் புகார் பட்டியல்கள் கொடுத்தார். அதை அதிகாரிகள் கண்டு கொள்ளவில்லை என்று கூறி அடுத்தநாள் இன்னும் கூடுதலாய் போராட்டம் முடுக்கி விடப்பட்டது. இதில் கோவை மாவட்டத்தில் உள்ள எஸ்.பி.வேலுமணி உள்ளிட்ட 9 எம்.எல்.ஏக்கள் கலந்து கொண்டனர்.
இவர்கள் அனைவரும் கோவை மாவட்ட ஆட்சியர் அலுவலகத்தில் 4 மணிநேரம் தர்ணா செய்தனர். ஒரு கட்டத்தில் போலீஸார் அத்தனை பேரையும் குண்டுக்கட்டாகத் தூக்கி போலீஸ் வாகனங்களில் ஏற்றி கைது செய்தனர். இரவு விடுவிக்கப்பட்ட அனைவரும் அடுத்த நாளும், அதற்கடுத்த நாளும் தேர்தல் முடியும் வரை கூட, ‘தேர்தலில் வரலாறு காணாத பணம் புழங்குகிறது. வாக்காளர்களுக்கு பணம் அளிக்கப்படுகிறது. வாக்கு செலுத்தும் இடத்தில் குளறுபடிகள் செய்து அத்தனை தொகுதிகளும் திமுக வெற்றி பெற்றதாக அறிவிக்கத் திட்டமிட்டிருப்பதாகவும், அதைக் கண்டித்து அதிமுக முன்னாள் அமைச்சர், எம்.எல்.ஏக்கள் அறிக்கைகள் விட்டனர். ஆங்காங்கே போராட்டங்களும் செய்தனர்.
இதற்கிடையில்தான் முன்னாள் அமைச்சர் ஜெயக்குமார் கள்ள ஓட்டுப் போட வந்த நபரைப் பிடித்துக் கொடுத்ததும், போலீஸார் கண்டுகொள்ளாத போக்கும் நடந்தது. மாறாக இந்த விவகாரத்தை ஒட்டி ஜெயக்குமாரே அடுத்தடுத்து மூன்று வழக்குகளில் கைது செய்யப்பட்டார். இதையொட்டியும் தமிழகமெங்கும் போராட்டங்கள் நடந்தது. அதையெல்லாம் ஆளுங்கட்சி சட்டை செய்யவில்லை. அதையொட்டி வெகுண்டஓபிஎஸ், ஈபிஎஸ் நீண்டதொரு கூட்டறிக்கை ஒன்றை வெளியிட்டனர்.
: “ஆளும் திமுகவின் கையாளாகாத் தனத்தையும், ஆளும் திமுக அமைச்சர்களின் அராஜகத்தையும், மக்களுக்குக் கொடுத்த வாக்குறுதிகளை நிறைவேற்றாத திமுக அரசின் செயல்பாடுகளையும், மக்களுக்குத் தெளிவாகப் புரிகின்ற வகையில் செய்தியாளர்களை சந்தித்து விளக்கமாக செய்திகளைத் தந்து கொண்டிருந்த அதிமுக அமைப்புச் செயலாளரும், வட சென்னை தெற்கு (கிழக்கு) மாவட்டக் கழகச் செயலாளரும், முன்னாள் அமைச்சருமான டி.ஜெயக்குமாரை, முதல் தகவல் அறிக்கையில் சொல்லி இருக்கும் எந்த சட்டப் பிரிவுகளின் கீழும், எந்த விதத்திலும் சம்பந்தப்படாத ஜெயக்குமாரை கைது செய்து நீதிமன்றக் காவலில் வைத்திருப்பதைக் கண்டித்தும், பிணையில் வரமுடியாத அளவிற்கு தொடர் வழக்குகளை அவர் மீது புனைய முயற்சிக்கும் திமுக அரசைக் கண்டித்து, அதிமுக சார்பில், வருகின்ற 28.2.2022 – திங்கட்கிழமை காலை 10.30 மணியளவில், தமிழகம் முழுவதும் வருவாய் மாவட்டத் தலைநகரங்களில் மாபெரும் கண்டன ஆர்ப்பாட்டங்கள் நடைபெறும்.
ஒரு குற்றச் செயல் நடைபெறுகிறது என்று சொன்னால் அதை தட்டிக் கேட்பதற்கும், அந்தக் குற்றம் நடைபெறா வண்ணம் குற்றச் செயலில் ஈடுபடும் நபரைக் கைது செய்வதற்கும் எல்லா நபருக்கும் உரிமை உள்ளது என்று சட்டம் சொல்லுகிறது. அதன் அடிப்படையில், கள்ள ஓட்டு போட வந்த ஒருவரை கையும் களவுமாகப் பிடித்து காவல் துறையிடம் ஒப்படைக்க அங்கிருந்தவர்கள் முயற்சித்தபோது, அந்த நபரை அடிக்க வேண்டாம் என்று சொல்லி காப்பாற்றி, காவல் துறையிடம் ஒப்படையுங்கள் என்று பொறுப்புடன் செயல்பட்டிருக்கும் முன்னாள் அமைச்சர் ஜெயக்குமார் செய்தது நியாயமான செயல்.
மேலும், பத்துக்கும் மேற்பட்ட குற்ற வழக்குகள் உள்ள, ஒரு குற்ற வழக்கில் சிறைத் தண்டனை பெற்ற, தொடர் குற்றம் புரியும் ஒரு குற்றவாளி நரேஷ்குமார் என்பவர் தேர்தல் நாளன்று அவர் வசிக்கும் பகுதிக்கும், அவர் வாக்களிக்கும் பகுதிக்கும் சம்பந்தம் இல்லாத வாக்குச்சாவடிக்கு வந்து திமுகவிற்கு ஆதரவாக கள்ள ஓட்டு போடுவதற்கு, அவரோடு முப்பதுக்கும் மேற்பட்ட நபர்கள் முனைப்பு காட்டியபோது, அதை

சட்டத்திற்கு உட்பட்டு தட்டிக் கேட்கின்ற வகையில், அவரின் கள்ள ஓட்டு நடவடிக்கையை தடுக்கின்ற விதமாகவும், அவரைப் பிடித்து தொடர் குற்றவாளி என்பதன் அடிப்படையில் அவரிடம் ஏதேனும் ஆயுதங்கள் உள்ளதா என்பதற்காகவும், அவரை சோதனை செய்து காவல் துறை வசம் ஒப்படைக்கப்பட்ட இந்தச் செயலுக்கு முன்னாள் அமைச்சர் ஜெயக்குமார் கைது செய்யப்பட்டிருப்பது திமுக அரசின் பாசிச மனோபாவத்தைத் தான் காட்டுகிறது.
கடந்த 23.2.2022 அன்று நீதிமன்றத்தில் பிணை மனு மீதான விசாரணை நடைபெற்றுக் கொண்டிருக்கும்போது, மேலும் ஜெயக்குமாரை சிறையில் வைக்க நீதிமன்றம் அனுமதிக்காது என்பதை அறிந்த திமுக காவல் துறை, எந்த விதத்திலும் பொருந்தாத, எந்த நீதிமன்றமும் ஏற்றுக்கொள்ளாத சட்டப் பிரிவுகளை மாற்றி, முதல் தகவல் அறிக்கையை மாற்றி நீதிமன்றத்தில் தாக்கல் செய்திருப்பது, கொடூர மனம் படைத்த திமுகவின் அரசியல் பழிவாங்கும் நடவடிக்கையாகத் தான் பெரும்பான்மையோர் கருதுகின்றனர்.
திமுகவைச் சேர்ந்த நரேஷ்குமார் அத்துமீறி நுழைந்து கள்ள ஓட்டு போட வந்ததைத் தடுத்து, காவல் துறையிடம் ஒப்படைத்த பிறகு, அவர் மீது வழக்கு தொடுக்காத திமுக காவல்துறை, அடுத்த வாக்குச் சாவடிக்கு வாக்குப்பதிவை பார்வையிடச் சென்ற ஜெயக்குமாரை மேற்கொண்டு செல்லவிடாமல் தடுத்த காவல் துறையைக் கண்டித்து சாலை மறியல் செய்தார் என்பதன் அடிப்படையில், பிணையில் விடக்கூடிய வழக்கைப் பதிவு செய்து நீதிமன்றத்திற்கு அனுப்பிய பிறகு, எந்த மேல் நடவடிக்கையும் எடுக்கமுடியாது என்று தெரிந்த பிறகு, அந்த முதல் தகவல் அறிக்கையையும் மாற்றம் செய்து பிணையில் வரமுடியாத வழக்குகளை சேர்த்து நீதிமன்றத்தில் திமுக காவல் துறை சமர்ப்பித்தது. ஆனால், அதை ஏற்றுக்கொள்ளாத நீதிமன்றம் இன்று (24.2.2022) அந்த வழக்கில் பிணை வழங்கி உத்தரவிட்டுள்ளது.
சட்டத்தை சட்டமாகவும், நீதியை நேர்மறையாகவும் சந்திக்க இயலாத திமுக அரசு, தன் கைப்பாவையாக மாற்றி வைத்திருக்கக்கூடிய காவல் துறையை ஏவல் துறையாக்கி இதுபோன்ற பழிவாங்குதல் நடவடிக்கையை, எந்தப் பொதுஜனமும் ஏற்றுக்கொள்ளாத வகையில் தொடர்ந்து செய்து கொண்டிருப்பது வன்மையாகக் கண்டிக்கக்கூடிய செயலாகும்.
உண்மை நிலையை உணராமல், யாரோ சொன்னதைக் கேட்டு மிகப் பெரிய குற்றப் பின்னணி கொண்ட, தொடர் குற்றம் புரியக்கூடிய, நீதிமன்றத்தால் தண்டனை பெற்ற ஒரு குற்றவாளியை தன்னுடைய தொண்டர் என பெருமையோடும், அந்தத் தொண்டனுக்கு ஒரு இன்னல் என்றால் நானே களம் இறங்குவேன் என கர்ஜிப்பதும், ஒரு முதல்வருக்கு, ஒரு கட்சியின் தலைவருக்கு அழகல்ல. காரணம், எந்தக் குற்றம் புரிந்தாலும் என் தலைவன் என்னைக் காப்பாற்றுவான் என்ற எண்ணத்தை திமுக-வினருக்கு அதன் தலைவரே அறிவுறுத்துவது போல உள்ளது.
அரசியல் பழிவாங்கும் நடவடிக்கையின் உச்சபட்சமாக, நீதியை நிலைநாட்ட வேண்டும்; பிடிபட்டவருக்கு எந்தவிதமான பாதிப்பையும் ஏற்படுத்தி விடக்கூடாது; சட்டத்தை தன் கையில் எடுத்துக்கொள்ளக் கூடாது என்ற நல்ல நோக்கோடு செயல்பட்ட முன்னாள் அமைச்சர் ஜெயக்குமார் மீது தனி மனிதத் தாக்குதலுக்கு உட்படுத்தி, சட்டத் தாக்குதல் நடத்தி, நீதிமன்றக் காவலில் வைத்திருப்பதை, எந்த நீதியும் ஏற்றுக்கொள்ளாது என்ற வகையில், திமுகவின் அடக்குமுறையையும், பழிவாங்கும் நடவடிக்கையையும், ஏதேச்சாதிகாரப் போக்கையும், பாசிச நடவடிக்கையையும் கண்டிக்கின்ற விதத்தில், அதிமுக சார்பில் வருகின்ற 28.2.2022 – திங்கட்கிழமை காலை 10.30 மணியளவில், தமிழகம் முழுவதும் வருவாய் மாவட்டத் தலைநகரங்களில் மாபெரும் கண்டன ஆர்ப்பாட்டங்கள் நடைபெறும். இந்தக் கண்டன ஆர்ப்பாட்டங்களுக்கான ஏற்பாடுகளை சம்பந்தப்பட்ட மாவட்ட செயலாளர்கள் செய்திட வேண்டும் என்று கேட்டுக் கொள்கிறோம்.
திமுக அரசின் அராஜகப் போக்கைக் கண்டித்து நடைபெற உள்ள இந்தக் கண்டன ஆர்ப்பாட்டங்களில், சம்பந்தப்பட்ட மாவட்டங்களைச் சேர்ந்த தலைமைக் கழக நிர்வாகிகளும், முன்னாள் அமைச்சர்களும், நாடாளுமன்ற, சட்டமன்ற உறுப்பினர்களும், கழகத்தில் பல்வேறு நிலைகளில் பணியாற்றி வரும் நிர்வாகிகளும், பொதுமக்களும் பெருந்திரளான அளவில் கலந்துகொண்டு, ஆர்ப்பாட்டத்தை ஆளும் திமுக அரசிற்கு எட்டுகின்ற வகையில் நடத்திடுமாறு கேட்டுக் கொள்கிறோம்” என்று அதில் கூறப்பட்டிருந்தது.
இதன் தொடர்ச்சியாக ஒவ்வொரு வருவாய் மாவட்ட தலைநகரங்களில் போராட்டத்திற்கு தயாராகி வந்த அதிமுகவினர் மத்தியில் உணர்ச்சி மயம். குறிப்பாக கோவை இதயதெய்வம் மாளிகையில் நடந்த ஆலோசனைக் கூட்டத்தில் தேர்தல் முறையாக நடக்கவில்லை. அராஜகம், அதிகார துஷ்பிரயோகம் எல்லாத்தையும் ஆளுங்கட்சி நடத்தி இந்த தேர்தலில் இந்த வெற்றியை எடுத்திருக்கிறது. இது வெற்றியே அல்ல!’’ என்று கொந்தளித்தனர் நிர்வாகிகள்.
இது குறித்து நம்மிடம் பேசிய கட்சிக்காரர்கள், ‘‘திமுகவிற்கு எங்கள் நிர்வாகிகள் முதல் தொண்டர்கள் வரை கட்டுக்குலையாமல் ஒற்றுமையாய் இருப்பது தாங்க முடியவில்லை. எனவேதான் ஜெயக்குமார் மீது மட்டுமல்ல, இன்னும் பல பேர் மீது வழக்குகளைப் போட்டுக் கொண்டே இருக்கிறது. இப்போது இருக்கும் ஓபிஎஸ், ஈபிஎஸ் தலைமை இதை சும்மா விடுவதாக இல்லை. மொத்தம் 66 எம்.எல்.ஏக்கள் இருக்கிறோம். கட்சிக்காரர்களுக்கு எந்த சிக்கலை இந்த அரசு கொடுத்தாலும், ஜெயக்குமாருக்கு மட்டுமல்ல, யாருக்கு எந்த மூலையில் தொந்தரவு நடந்தாலும் இதே மாதிரி போராட்டங்கள் நடைபெறும். சிறை செல்லவும் அஞ்சாத அதிமுக தலைவர்களை திமுக அரசாங்கம் இனி பார்க்கும்!’’ என்றனர்.

……………KAMALA KANNAN.S Contact No: 9244317182

scroll to top